Cymdeithas Tai Barcud – William Ainge Court, Powys

Cefndir

Gwneir gwaith ôl-osod thermol a mecanyddol a gwelliannau i floc presennol o 23 o fflatiau o'r 1970au o dan ORP 2.1. Mae'r adeilad yn adeiladwaith wal geudod bloc brics traddodiadol. Mae'r technolegau a ddefnyddir yn cynnwys paneli solar ffotofoltäig a dargyfeiriwyr ffotofoltäig, uwchraddio rheoli gwresogi ac uwchraddio rheiddiaduron.

Dysgu o’r prosiect:

Yr hyn mwyaf sylweddol a ddysgwyd trwy gydol y prosiect hwn oedd sut i gyflawni Tystysgrif Perfformiad Ynni A. Er mwyn cyflawni sgôr A yn y 23 o fflatiau yn William Ainge Court, roedd angen cryn dipyn o waith. Roedd y gwaith hwn yn cynnwys gwresogyddion cadw gwres uchel newydd, silindr dŵr poeth deallus Mixergy, ffenestri gwydr triphlyg, a tho newydd gyda phaneli solar ffotofoltäig. Mae’r paneli solar ffotofoltäig wedi’u cysylltu â’r silindr dŵr poeth deallus.

Arloesedd yn y prosiect:

Gosodwyd silindr dŵr poeth deallus Mixergy, a oedd yn cysylltu â’r paneli solar ffotofoltäig. Mae’r silindr dŵr poeth yn system ddeallus sy’n gweithio yn unol â’r galw gan ddeiliaid y tŷ ac mae ond yn gwresogi’r swm a ddefnyddir yn rheolaidd gan y deiliad. Mae botwm hybu os oes angen mwy o ddŵr poeth.

Heriau:

Roedd y fflatiau yn William Ainge Court i gyd wedi eu meddiannu pan ddechreuodd y gwaith ôl-osod. Nid oedd yn bosibl symud y trigolion yn ystod y gwaith hwn. Roedd trefnu’r gwaith tra oedd y tenantiaid yn parhau i fod yn feddianwyr yn her enfawr. Roeddem am gadw’r aflonyddwch cyn lleied â phosibl. Trefnwyd y gwaith mewn dau gam: yn gyntaf, ailosodwyd y gwresogyddion panel yn ystod misoedd yr hydref i helpu’r tenantiaid cyn y gaeaf; yn ail, newidiwyd y silindr dŵr poeth i danc Mixergy. Yna ailosodwyd y to a’r ffenestri yn ystod misoedd y gwanwyn i helpu i gyflawni Tystysgrif Perfformiad Ynni A. Unwaith y cwblhawyd y gwaith, cynhaliwyd archwiliad dilynol i sicrhau bod popeth yn gweithio’n gywir yn dilyn y gwaith.